Robben: Erum betri en í fyrra

Bayern München er komið með annan fótinn í úrslit Meistaradeildar Evrópu eftir 4-0 sigur á Barcelona í fyrri leik liðanna. Bayern þarf samt að komast í gegnum erfiðar 90 mínútur á Camp Nou í kvöld til þess að komast í úrslit.

Arjen Robben, leikmaður Bayern, er bjartsýnn enda segir hann að Bayern sé betra lið en í fyrra er það tapaði í úrslitum gegn Chelsea.

"Við áttum aldrei að tapa úrslitaleiknum í fyrra. Við höfum engu að síður bætt okkur síðan þá. Við erum í undanúrslitum og löngu búnir að vinna deildina heima. Það er ekki hægt að biðja um meira og við erum til í að taka næsta skref," sagði Robben.

"Ég mun gera allt sem ég get til þess að vinna Meistaradeildina. Ég hef farið tvisvar í úrslit með Bayern og tvisvar í undanúrslit með Chelsea. Á einhverjum tímapunkti þarf ég að vinna bikarinn. Vonandi geri ég það í ár."

Leikur Barcelona og Bayern hefst klukkan 18.45 og er í beinni útsendingu á Stöð 2 Sport. Upphitun hefst klukkan 18.00.