Flugukastkeppni á afmælisári

Stangaveiðifélag Akureyrar sem er tíu ára á þessu ári hyggst meðal annars minnast tímamótanna með flugukastkeppni við Leirutjörn.

Stangaveiðifélag Akureyrar var stofnað á Hótel KEA í maí 2003 að viðstöddu fjölmenni að því er segir á heimasíðu félagsins.

"Af þessu tilefni langar stjórn SVAK að blása til afmælisfagnaðar 1. júní næstkomandi í þeirri von að þá verði allur snjór á bak og burt og gráðustokkurinn kominn vel í plús," segir á svak.is þar sem menn eru beðnir að taka endilega daginn frá til að fagna með félaginu.

Afmælisfagnaður byrjar við Leirutjörn 1. júní þar sem meðal annars verður flugukastkeppni og grillveisla. Um kvöldið er síðan veisla í Zontahúsinu. Þar verður saga Stangaveiðifélags Akureyrar rakin í máli og myndum og verðlaun veitt fyrir bestu veiðisöguna.