Gylfi í banni í fyrsta leik

Haukamaðurinn Gylfi Gylfason verður í banni þegar að Haukar mæta Fram í fyrsta leik liðanna í lokaúrslitum N1-deildar karla.

Gylfi fékk rautt spjald fyrir að brjóta á Ingimundi Ingimundarsyni, leikmanni ÍR, í leik liðanna í gær. Atvikið átti sér stað undir lok leiksins en Haukar unnu og tryggðu sér þar með sigur í einvíginu.

HSÍ hefur staðfest að agaskýrsla barst frá dómurum leiksins vegna brots Gylfa og verður hann því í banni þegar að Haukar mæta Fram á mánudagskvöldið næsta.

„Þetta var klárlega rautt spjald á Gylfa. Þetta var fólskuleg árás og á ekki sjást í handbolta,“ sagði Bjarki Sigurðsson, þjálfari ÍR, um rauða spjaldið sem Gylfi fékk.

Sturla Ásgeirsson, leikmaður ÍR, fékk einnig rautt spjald í leiknum þegar hann kastaði boltanum í höfuð Arons Rafns Eðvarðssonar, markvarðar Hauka, úr vítakasti.

Dómarar leiksins skiluðu hins vegar ekki inn agaskýrslu vegna þess brots og fær Sturla því ekki leikbann.