Räikkönen fljótastur á æfingum í Malasíu

Kimi Räikkönen á Lotus var fljótastur á seinni æfingunni í Malasíu sem fram fór í morgun. Hann var örlítið fljótari en Sebastian Vettel á Red Bull og Felipe Massa á Ferrari. Rigning setti strik í reikninginn á seinni æfingunni.

Það byrjaði að hellirigna þegar klukkutími var liðinn af æfingunni og eðlilega bætti enginn tíma sinn eftir að brautin blotnaði. Liðunum tókst hins vegar að safna nógu mikið af gögnum til þess að átta sig á að dekkjaslitið í Malasíu er mun meira en í Ástralíu.

„Ég er bara ekki viss hvort við séum með nógu mörg dekk til að klára kappaksturinn," sagði Vettel. Hverjum ökumanni er útvegað ákveðið mörg dekk fyrir hverja helgi. Liðsfélagi Vettels, Mark Webber, segir Formúlu 1 nú eingöngu stjórnast af dekkjum. „Allt snýst um dekk. Dekk, dekk, dekk, dekk!"

Lewis Hamilton er ánægður með sína stöðu eftir æfingarnar og segist vera í góðum málum fyrir kappaksturinn. Hraðinn virðist vera til staðar. „Við áttum góða æfingu þegar við ókum á keppnishraða, svo við erum ekki að éta upp dekkin of mikið," sagði Hamilton. Þrátt fyrir náði hann aðeins níunda besta tíma á seinni æfingunni.

McLaren-liðið virðist enn vera í ruglinu því þeir Sergio Perez og Jenson Button áttu aðeins ellefta og tólfta besta tíma morgunsins. Button er þó ekki búinn að gefa titilvonirnar upp á bátinn og segir liðið vel geta snúið erfiðri stöðu sér í hag.