Google fékk nýyrðið ogooglebar afturkallað í Svíþjóð

Forráðamenn Google leitarvélarinnar hafa fengið kröfu sinni framgengt í Svíþjóð um að nýyrði sem málfarsnefnd Svía samþykkti nýlega verður afturkallað.

Nýyrði þetta er "ogooglebar" en á sænsku nær það yfir orð sem ekki er hægt að finna með neinni leitarvél á netinu. Forráðmenn Google töldu hinsvegar að þetta nýyrði næði aðeins yfir leit með Google og væri til skaða fyrir vörumerki sitt.

Frekar en að fara í hart ákvað málnefndin að gefa eftir, en lýsti jafnframt yfir óánægju sinni með að Google sé að reyna að stjórna tungumálinu. Meðal annarra orða sem sænska málnefndin var með á lista yfir nýyrði að þessu sinni voru "emoji" (broskallar og fleiri tákn sem eru notuð til að sýna tilfinningar í textaskilaboðum), "grexit" (möguleg útganga Grikklands af Evrusvæðinu) og "kopimism" (trúarleg og pólitísk hugmyndafræði sem byggir á upplýsingafrelsi). Orðið "googla" var tekið inn í sænskt mál árið 2003.