Wenger: Vorum ótrúlega nálægt þessu

Arsene Wenger, stjóri Arsenal, var stoltur af sínu liði sem vann flottan 0-2 sigur á Bayern München en er engu að síður úr leik í Meistaradeildinni.

"Mér fannst við vera ótrúlega nálægt þessu. Við vorum líka stundum óheppnir. Ég er þá að vitna í færið hjá Gervinho sem og nokkrar aukaspyrnur," sagði Wenger eftir leikinn.

"Í heildina þá gáfum við þessu séns. Aðaleftirsjáin er að hafa gefið mjög ódýrt mark undir lok fyrri leiksins. Ef við hefðum tapað 2-1 þá hefði þetta verið allt annað.

"Ég þekki mína leikmenn vel og þeir hafa frábært viðhorf og liðsandinn er mikill. Við erum með gæðin til þess að vera í þessari keppni en því miður erum við úr leik. Það er sárt en jákvæðu hlutirnir eru frammistaðan og liðsandinn."