Byrjuðu á verðinu

Nýi CLA bíll Benz á að höfða til ungs fólks og verðið vestanhafs er 29.900 dollarar.

Nýjasti bíll Mercedes Benz, CLA kostar 29.900 dollara í Bandaríkjunum og það var það fyrsta sem ákveðið var, áður en hann komst á teikniborðið. Þá var Benz að velta fyrir sér hvernig mætti freista ungra kaupenda þar sem annarsstaðar og árið var 2009. Svarið var einfalt – með verði sem ekkert ætti skilt við Mercedes Benz.

Með þetta verð var lagt af stað og hannaður bíll sem félli yngri kaupendum í geð og að sjálfsögðu yrði hann með "coupe"-lagi og sportlegur, en framhjóladrifinn til að halda niðri verðinu. Bíllinn kostar því innan við 4 milljónir króna vestanhafs en ekki er ljóst á hvaða verði hann býðst hér á landi en hann er væntanlegur í sölu hjá Öskju í aprílmánuði.

Bíllinn átti að minnsta kosti að vera 5.000 dollurum ódýrari en C-Class bílarnir en endaði reyndar 6.375 dollurum lægri, en ódýrasta gerð C-Class kostar 36.275 dollara. Endanlegt verð CLA bílsins var tilkynnt í Bandaríkjunum á Superbowl úrslitaleiknum í Bandarískum fótbolta. Markhópurinn sem Mercedes Benz horfir til með CLA bílnum er á aldrinum 30-40 ára.

CLA bíllinn er smíðaður í nýrri verksmiðju Benz í Ungverjalandi og er það ein skýring þess hve bíllinn er ódýr. Laun þar í landi eru talsvert mikið lægri en starfsfólks bílaverksmiðja Benz í Þýskalandi. Verksmiðjan í Ungverjalandi getur nú smíðað 150.000 bíla á ári en gæti aukið framleiðsluna í 300.000 bíla árið 2015.