Hölkná og Ólafsfjarðará kynntar í Amaróhúsinu

Ólafsfjarðará og Hölkná í Þistilfirði verða kynntar á opnu húsi á Akureyri annað kvöld.

Ragnar Hólm Ragnarsson mun fræða menn um Ólafsfjarðará, sem er fín bleikjuá. Ólafsfjarðará er dragá sem á upptök austast á Lágheiðinni og rennur til Ólafsfjarðarvatns í Ólafsfirði. Hún er 61 kílómetra löng og meðalvatnsmikil. Henni er skipt í tvö svæði og er veitt á tvær stangir á hvoru svæði.

Auk kynningar um Ólafsfjarðará mun fulltrúi Stangaveiðifélagsins Flugunnar á Akureyri lýsa leyndardómum Hölknár í Þistilfirði, sem er laxveiðiá. Hölkná er 49 kílómetra löng dragá sem fellur í Þistilfjörð hjá Ytra Álandi. Á árunum 1974 til 2008 veiddist að meðaltali 91 lax í ánni á ári.

Eins og áður eru það Stangaveiðifélag Akureyrar, Stangaveiðifélagið Flugan á Akureyri og Stangaveiðifélagið Flúðir sem standa saman að opna húsinu. Það er haldið í Amaróhúsinu við göngugötuna á Akureyri og hefst klukkan 20, annað kvöld - mánudag.

trausti@frettabladid.is