Newey segir frumsýningar gamaldags

Adrian Newey, yfirhönnuður Red Bull-liðsins í Formúlu 1 og einhver sigursælasti hönnuður í mótorsporti allra tíma, segir frumsýningar á nútíma Formúlu 1-bílum vera úrelltar.

Þetta sagði hann við fjölmiðla eftir að hulunni hafði verið svipt af nýjasta hugarfóstri sínu RB9-bíl Red Bull-liðsins fyrir árið 2013. Ástæðuna fyrir þessari skoðunn sinni segir hann vera þær breytingar sem Formúlu 1-leikurinn hefur gengið í gegnum síðasta áratuginn.

"Það sem hefur breyst hvað mest í Formúlu 1 á síðustu 10 árum er hversu títt keppnisbílarnir eru uppfærðir yfir árið," sagði Newey. "Það var sú tíð þegar maður kynnti yfirburðabíl í byrjun tímabilsins og svo lengi sem bíllinn reyndist áreiðanlegur mundi liðið vinna heimsmeistaratitilinn."

Newey hefur hannað marga slíka bíla á ferli sínum. Meðal þeirra má nefna Williams-bílana 1992 og 1993 og McLaren-bíl Mika Hakkinen árið 1998, svo bestu dæmin séu tekin.

"Svona er þetta ekki lengur því leikurinn snýst meira um stöðugar uppfærslur. Svo lengi sem reglurnar eru stöðugar mætti ímynda sér að fyrir hvern kappakstur komi nýr bíll. Það sem er breytt núna er að á milli síðustu keppni og fyrstu keppni ársins í ár liðu tveir mánuðir en ekki tvær vikur," sagði Newey.

Frumsýning Red Bull-liðsins um helgina endurspeglaði þetta viðhorf Newey á margan hátt enda var hún lágstemd. Blaðamenn hinna ýmsu miðla veltu því fyrir sér hvort Adrian Newey hefði skapað enn aðra draumavélina fyrir Sebastian Vettel.

Allar myndatökur voru bannaðar í salnum þar sem frumsýningin átti sér stað og blaðamenn fengu ekki aðgang að þráðlausu neti. Myndirnar sem Red Bull-liðið sendi frá sér sýna jafnframt ekki mikið af viðkvæmustu svæðum bílsins og virðast frekar vera til þess ætlaðar að hygla aðalstyrktaraðila liðsins, Infiniti.

Newey vill samt ekki meina að þeir séu í meiri feluleik en keppinautarnir og svaraði: "Hin liðin hafa aðeins veitt aðgang að myndum sem sýna takmarkað af bílunum eins og við."