Sigurður Pálsson kennir fluguhnýtingar

Hinn kunni veiðimaður og fluguhnýtari Sigurður Pálsson verður enn á ný með hnýtingarkvöld fyrir félagsmenn Stangaveiðifélags Reykjavíkur (SVFR). Sigurður er meðal annars þekktur fyrir að vera höfundur Flæðamúsarinnar og Dýrbítsins sem báðar eru frábærar veiðiflugur.

Félagsmenn SVFR eru að sjálfsögðu velkomnir og mega þeir taka með sér gesti að því er segir á vefsíðu SVFR. Sigurður verður með kennslu tíu sinnum í vetur og vor og verður fyrsta hnýtingarkvöldið haldið klukkan 19.30 í kvöld í húsnæði SVFR að Rafstöðvarvegi 14 í Elliðaárdal.

Annars verða hnýtingarkvöldin sem hér segir: 31. janúar, 7. febrúar, 14. febrúar, 21. febrúar, 7. mars, 21. mars, 4. apríl, 18. apríl, 2. maí og 16. maí. Á fyrstu þremur kvöldunum verður lögð áhersla á að kenna byrjendum.

„Hér er kjörinn vettvangur fyrir vana sem óvana að koma saman, hnýta flugur og spjalla. Allt efni er á staðnum og einnig þau tæki sem þarf til hnýtinganna," segir í vef SVFR.

Í Fréttablaðinu þann 31. mars árið 2011 birtist viðtal við Sigurð, sem hægt er að lesa hér.

trausti@frettabladid.is