Kenna stangveiði í grunnskólanum

Grunnskóli Fjallabyggðar hefur undanfarin ár boðið tveimur elstu bekkjum skólans uppá fjölda valgreina, í samræmi við lög. Frá því er sagt á vef Stangveiðifélags Siglufjarðar að fluguhnýtingar og stangveiði hafa verið valgreinar um nokkurt skeið. Nú í vetur hafa um 30 nemendur af 60 valið þessar greinar. Strákarnir eru fleiri, en margar stúlkur hafa einnig valið að læra að hnýta og kasta flugu. Veiðivísir spyr hvort þessi valgrein hljóti ekki að vera einsdæmi hér á landi?

„Stangveiðifélag Siglfirðinga hefur tekið þátt í þessari uppbyggingu sem er að eiga sér stað í Fjallabyggð. Félagið hefur boðið nemendum að veiða í Héðinsfirði og Flókadalsá í Fljótum, þegar veiðitímabilið er í fullum gangi. Stangveiðifélag Siglfirðinga, Sparisjóður Siglfirðinga og Vesturröst tóku sig saman um að gefa Grunnskóla Fjallabyggðar þrjár fullbúnar fluguveiðistangir sem notaðar verða við kennslu og veiði," segir í frétt stangveiðifélagsins.

Í fluguhnýtingum er nemendum kennd undirstöðuatriðin og búa þau til nokkrar. Lokaverkefnið er að hanna sína eigin flugu. Í stangveiði fara nemendur í kastkennslu með flugustöngum í íþróttahúsinu á Siglufirði. Einnig fá nemendur fræðslu um allan þann búnað sem fylgir fluguveiði sem og hvernig á að umgangast náttúruna og íbúa vatna og áa. Síðustu tvö ár hafa nemendur farið í vorveiði í Litluá í Kelduhverfi.

svavar@frettabladid.is