Meiri metnað, takk!

Friðrik Ómar

Outside the Ring

Rigg



Outside the Ring er fimmta sólóplata Friðriks Ómars og sú fyrsta sem er eingöngu með frumsömdu efni.

Friðrik er afkastamikill og á að baki fjölmargar plötur sem flytjandi, bæði einn og í samstarfi við aðra, til dæmis Guðrúnu Gunnars, Jógvan og Regínu Ósk. Friðrik Ómar er ágætis söngvari og þessi plata er eflaust stórt skref fyrir hann á ferlinum.

Hún er líka að mörgu leyti fagmannlega unnin. Vandamálið er bara hvað tónlistin á henni er mikil klisja. Bæði laga- og textasmíðarnar hljóma eins og mörg önnur lög úr heimi júró- og danspopps. Textarnir, sem eru á ensku, fjalla flestir um ástina og hljóma eins og þeir séu endurunnir upp úr ótal öðrum textum.

Það er mikill munur á textunum hér og t.d. hjá Páli Óskari sem einnig starfar í heimi diskós og júrópopps. Palli setur alltaf eitthvað af sjálfum sér í textana, en hér er ekkert nema endurtekningar á gömlum frösum. Undantekningin er ljóð Steins Steinars, Utan hringsins, en orðsnilld skáldsins skilar sér ekki vel í ensku þýðinguna.

Nú er það auðvitað ekki endilega tilgangurinn með plötuútgáfu að gera eitthvað nýtt og ferskt og kannski er til fullt af fólki sem tekur þessari plötu fagnandi. Persónulega finnst mér hún alltof flöt og óspennandi. Meiri metnað takk!

Niðurstaða: Fagmannlega unnið, en óspennandi.