Stór Mandela-tónleikahelgi í maí á næsta ári

Tónleikar Bryans Ferry í Hörpunni á sunnudag og mánudag marka upphafið að alþjóðlegum Mandela-dögum í Reykjavík. Fyrirhugaðir eru fleiri tónleikar og viðburðir í Reykjavík til vitundarvakningar og stuðnings mannúðarsjónarmiðum Mandela, fyrrum forseta Suður-Afríku, í samvinnu við Nelson Mandela-stofnunina.

Þeir næstu verða helgina 17. og 18. júlí en sá 18. er einmitt fæðingardagur Mandela. Þá stígur á svið í Reykjavík þekktur erlendur flytjandi og verður tilkynnt um hann fljótlega. Helgina 21. og 22. september verður svo önnur uppákoma tengd Mandela-dögunum.

„Við erum að skipuleggja eitt ár fram í tímann. Þetta verða hinar ýmsu uppákomur sem enda með stórri tónleikahelgi í maí á næsta ári," segir Sigurjón Einarsson, stjórnarformaður Mandela Days Reykjavík. „Þessir tónleikar hafa verið haldnir víða síðustu tíu ár og þar hafa komið fram hinir ýmsu listamenn. Þetta er langur listi með stórum nöfnum og við erum að vinna í honum og athuga hverjir geta komið á hvaða dögum."

Tónleikarnir í maí 2013 áttu upphaflega að vera í september á þessu ári en ekkert varð af því. „Það sem er erfitt við að halda stóra tónleika eins og þessa á Íslandi er að það er rosalega erfitt að fá hótelgistingu fyrir stóra og mikla hópa á háannatíð hjá hótelunum. Við ákváðum að teygja á verkefninu í eitt ár, líka vegna þess að þá höfum við úr fleiri listamönnum að moða."

Aðspurður segir Sigurjón að Bryan Ferry sé mjög spenntur fyrir tónleikunum á Íslandi.

„Þetta verður rosalega stórt og mikið „show" og eitt það stærsta sem hefur verið í Hörpu nokkru sinni. Hingað koma gámar af búnaði með skipum og þetta verður mikil veisla bæði í tónum og myndum."

Ósóttar pantanir eru til sölu á fyrri tónleikana og enn eru til miðar á þá síðari. Miðasala fer fram á Harpa.is og Midi.is.

freyr@frettabladid.is