Seiðandi undirfatnaður og lífleg náttföt

Undirfataverslunin Boux Avenue var opnuð í Kringlunni 16. maí síðastliðinn. Boux Avenue er breskt merki og er Boux Avenue í Kringlunni fyrsta verslunin sem er opnuð utan Bretlands. Þar er að finna falleg undirföt, sundföt, náttföt og hina ýmsu fylgihluti.

Úrvalið spannar allt frá hversdagsnærfatnaði til seiðandi undirfata. Eins má finna ýmiss konar nærfatnað með skemmtilegu ívafi, líflegar náttbuxur, náttföt og bikiní. Að sögn Jennýjar Kristínar Sigurðardóttur er hún hinn fullkomni áfangastaður kvenna sem vilja gefa undirfataskúffunni nýtt líf.

Þá er lögð mikil áhersla á gott úrval stærða. Brjóstahaldararnir eru frá 30A upp í 40H og aðrar vörur, svo sem nærbuxur og náttföt, fást í stærðunum 8 til 20.

Starfsfólk verslunarinnar er þjálfað til að mæla viðskiptavini og veita bestu þjónustu sem völ er á við val á nærfatnaði. Verslunin er hönnuð með nýstárlegum hætti og er aðgengi að vörunum gott.

Nærfatnaðinum er snyrtilega raðað í skúffur eftir stærðum svo auðvelt er að finna sína stærð. Hægt er að skoða vöruúrvalið á bouxavenue.com.