Haukar vinna á vörn og markvörslu

Seinni undanúrslitaviðureignin í N1-deild karla hefst í kvöld þegar HK sækir deildarmeistara Hauka heim. Fréttablaðið fékk Einar Jónsson, þjálfara Fram, til þess að spá í spilin.

„Haukarnir vinna þetta á tvennu: vörn og markvörslu. Þar hafa þeir verið frábærir í vetur og verið að bæta sig stöðugt," sagði Einar.

„Aron Rafn markvörður byrjaði rólega en er í alþjóðaklassa að mínu mati og búinn að vera einn besti maður deildarinnar. Svo er næstbesti markvörður landsins á bekknum. Það er ekki ónýtt að fara út í úrslitakeppni vitandi að þú færð alltaf 20 varða bolta."

HK-liðið hefur bitið hraustlega frá sér í vetur en hvað þarf að ganga upp hjá þeim svo þeir eigi möguleika gegn Haukum?

„Markvarslan hjá þeim verður að lagast. HK á tvo fína markverði en þeir hafa ekki staðið sig eins vel og maður bjóst við. Arnór var bara frábær gegn okkur og ég þakka honum fyrir það. Bæði hann og Björn eiga mikið inni og þeir verða að stíga upp núna," sagði Einar og bætti við:

„HK er þess utan afar vel skipulagt lið og sterkt á báðum endum vallarins. Þeir eiga þrjá menn sem geta tekið af skarið í sókninni og breidd í vörninni hjá sér. Það háir þeim að markvarslan er minni hjá þeim en öðrum."

Einar segir að Haukarnir þurfi samt að hafa mikið fyrir hlutunum.

„Haukar vinna í kvöld og einvígið. Ég hef samt mikla trú á þessu HK-liði og ef markvarslan dettur í gang, eins og hjá FH í fyrra, þá er liðið til alls líklegt. Ég held að þessi rimma fari alla leið og Haukar vinni 3-2."