Braut gleraugu eldri borgara er hann fagnaði

Danny Amendola, leikmaður St. Louis Rams, fagnaði snertimarki með látum um helgina. Ekkert var óeðlilegt við fagnið sem slíkt en hann hefði mátt gæta betur að sér.

Amendola negldi boltanum í jörðina eftir að hafa skorað. Hann var þó aðeins of nálægt fólki því boltinn fór af jörðinni og beint í andlitið á eldri borgara sem var að vinna á leiknum.

Sá var með gleraugu og splundruðust þau í andlit starfsmannsins. Amendola tók ekki eftir því og hélt á bekkinn. Honum var svo bent á slysið og þá fór hann með bolta til að gefa starfsmanninum.

Hann gaf aftur á móti vitlausum starfsmanni boltann. Sá er meiddist var þá kominn undir rjáfur að láta hlúa að sér.