Messi: Ég elska þig, Thiago

Lionel Messi tileinkaði mörkin sín tvö gegn Levante í spænsku úrvalsdeildinni í gær nýfæddum syni sínum.

Eins og sést á meðfylgjandi mynd var Messi búinn að skrifa kveðju til sonar síns á band um úlnliðinn. Á því stóð „Te amo Thiago" (ég elska þig, Thiago).

Thiago kom í heiminn þann 2. nóvember síðastliðinn og er fyrsta barn Messi. Eftir að Thiago kom í heiminn hefur Messi skorað níu mörk í sex leikjum með Barcelona - sex í spænsku úrvalsdeildinni og þrjú í Meistaradeildinni.

Hann hefur nú skorað 82 mörk á þessu ári og vantar því aðeins þrjú mörk upp á að jafna markamet Gerd Müller.