Veikur þjálfari Colts sá Luck setja met

Það var mikið áfall fyrir NFL-lið Indianapolis Colts þegar þjálfari liðsins, Chuck Pagano, var greindur með hvítblæði í upphafi tímabilsins.

Það var það síðasta sem ungt og óreynt lið Colts þurfti á að halda. Liðinu var spáð slöku gengi en með Andrew Luck, sem var valinn fyrstur í nýliðavalinu, í banastuði hefur Colts tekist að vinna fimm leiki á móti þremur töpum. Magnaður árangur.

Luck setti nýliðamet í gær þegar hann kastaði boltanum 433 jarda fyrir framan Pagano sem var mættur í stúkuna að fylgjast með drengjunum.

Eftir leik mætti Pagano inn í klefa til drengjanna og hélt sterka ræðu sem snerti alla sem þar voru.

"Við finnum fyrir nærveru hans alla daga. Það gaf okkur svo mikið að sjá hann og heyra í honum á nýjan leik," sagði Luck sem sló ársgamalt met Cam Newton.