Dúkkuhús úr hillum

Gamlar hillur má nýta til ýmissa hluta. Það er upplagt að nota eldri hillur sem hætt er að nota og búa til úr þeim dúkkuhús fyrir yngstu börnin. Það dugar að nota eina hillu en ef tvær eins hillur eru til á heimilinu má tengja þær með tveimur lömum og búa til sannkallað stórhýsi.

Hver hilla myndar nýja hæð í húsinu og ákvarðar stærð hússins. Mesta vinnan liggur í því að mála veggina. Það er upplagt að þekja veggi heimilisins með ólíkum litum eða veggfóðri og þá er um að gera að leyfa hugmyndafluginu að njóta sín. Ein hæðin gæti innihaldið ljósan lit, önnur gæti haft veggfóður úr gömlum efnisbútum og svo má skreyta barnaherbergin með ýmsum dúllum.

Á hverja hæð er upplagt að útbúa glugga, annað hvort með því að saga þá út (sem er meira mál) eða einfaldlega mála þá á vegginn. Að sama skapi er hægt að bæta við hurðum, málverkum, stiga og ýmsum stærri heimilistækjum á veggi hússins.

Svo heimilið standi ekki autt má fylla húsið með þeim litlu húsgögnum sem börnin eiga úr öðrum leiktækjum og tilvalið er að virkja afa og ömmu til að föndra fallega hluti í nýja húsið. Íbúar dúkkuhússins þurfa auðvitað ekki að vera dúkkur. Playmobil-karlar kunna vel við sig í slíkum húsum og allar þær litlu verur sem búa í barnaherbergjum landsins.

www.bergruniris.com