Vettel og Webber ræsa fremstir í Indlandi

Heimsmeistarinn Sebastian Vettel ræsir indverska kappaksturinn af ráspól í Red Bull-bílnum sínum, við hliðina á liðsfélaga sínum Mark Webber. McLaren bílarnir voru mun nær Red Bull en væntingar stóðu til.

Vettel hefur verið fljótastur í öllum æfingum fyrir kappaksturinn og var fyrirfram talinn geta landað ráspól hér. Þetta er þriðji kappaksturinn í röð sem Red Bull-bílarnir ræsa í fyrsta og öðru sæti á ráslínunni.

Lewis Hamilton mun ræsa þriðji. Hann leit ekki út fyrir að vera neitt sérstaklega ánægður með þá rástöðu þegar hann stillti sér upp fyrir myndatöku ásamt Vettel og Webber. Hamilton þurfti að berjast við bílinn alla tímatökuna. Liðsfélagi hans, Jenson Button, var í svipuðum vandræðum en ræsir fjórði.

Martin Whitmarsh, liðstjóri McLaren-liðsins, sagði fyrir tímatökuna að þeir ættu í erfiðleikum með að ná nægum hita í dekkin til þess að hámarka virkni þeirra. Það er að öllum líkindum ástæðan fyrir erfiðleikum ökumannanna.

Fernando Alonso ræsir kappaksturinn í fimmta sæti. Liðsfélagi hans hjá Ferrari, Felipe Massa, ræsir sjötti. Alonso átti aldrei möguleika á ráspól, jafnvel þó þeir Massa hafi hjálpað hvor öðrum með hraða niður langa beina kaflan.

Kimi Raikkönen var heppinn að komast í gegnum síðasta niðurskurðinn og inn í þriðju og síðustu lotu tímatökunnar. Raikkönen hefur aldrei keppt í Indlandi áður og virtist enn vera að kynna sér brautina.

Sergio Perez á Sauber og Pastor Maldonado á Williams ræsa í áttunda og níunda sæti á undan Nico Rosberg á Mercedes. Maldonado og liðsfélagi hans Bruno Senna voru mjög fljótir í fyrstu lotu tímatökunnar. Maldonado lauk fyrstu lotunni fljótastur.

Force India-liðið er að öllum líkindum ekki ánægt með árangur sinn á heimavelli. Paul di Resta sagði við Sky Sports eftir aðra lotu tímatökunnar að bílinn væri erfiður við að eiga. Di Resta ræsir sextándi og liðsfélagi hans Nico Hulkenberg tólfti.

1	Sebastian Vettel	Red Bull/Renault	1'25.283	-
2	Mark Webber	Red Bull/Renault	1'25.327	0.044
3	Lewis Hamilton	McLaren/Mercedes	1'25.544	0.261
4	Jenson Button	McLaren/Mercedes	1'25.659	0.376
5	Fernando Alonso	Ferrari	1'25.773	0.49
6	Felipe Massa	Ferrari	1'25.857	0.574
7	Kimi Räikkönen	Lotus/Renault	1'26.236	0.953
8	Sergio Pérez	Sauber/Ferrari	1'26.360	1.077
9	Pastor Maldonado	Williams/Renault	1'26.713	1.43
10	Nico Rosberg	Mercedes	-	-
11	Romain Grosjean	Lotus/Renault	1'26.136	0.853
12	Nico Hülkenberg	Force India/Mercedes	1'26.241	0.958
13	Bruno Senna	Williams/Renault	1'26.331	1.048
14	M.Schumacher	Mercedes	1'26.574	1.291
15	Daniel Ricciardo	Toro Rosso/Ferrari	1'26.777	1.494
16	Paul Di Resta	Force India/Mercedes	1'26.989	1.706
17	Kamui Kobayashi	Sauber/Ferrari	1'27.219	1.936
18	Jean-Eric Vergne	Toro Rosso/Ferrari	1'27.525	2.242
19	Vitaly Petrov	Caterham/Renault	1'28.756	3.473
20	H.Kovalainen	Caterham/Renault	1'29.500	4.217
21	Timo Glock	Marussia/Cosworth	1'29.613	4.33
22	Pedro de la Rosa	HRT/Cosworth	1'30.592	5.309
23	N.Karthikeyan	HRT/Cosworth	1'30.593	5.31
24	Charles Pic	Marussia/Cosworth	1'30.662	5.379