Kínverskt fyrirtæki í mál við Barack Obama

Kínverska fyrirtækið Ralls Corp hefur ákveðið að höfða mál gegn Barack Obama forseta Bandaríkjanna þar sem hann kom í síðust viku í veg fyrir að fjárfesting fyrirtækisins í Bandaríkjunum yrði að veruleika. Fyrirtækið hugðist reisa vindmyllugarð í Oregon og selja raforku inn í Bandaríkjamarkað, en Obama stöðvaði áformin á grundvelli ákvæðis í lögum sem varða þjóðaröryggi.

Þetta er í fyrsta sinn í 22 ár sem erlend fjárfesting er stöðvuð í Bandaríkjunum, að því er segir í frétt breska ríkisútvarpsins BBC um málið.

Ralls Corp er í eigu tveggja stjórnenda fyrirtækisins Sany Group, sem er stærsti vélaframleiðandi fyrir orkugeirann í Kína.

Fyrirtækið telur Obama ekki hafa fært fram sannanir fyrir því að starfsemi fyrirtækisins í Kína geti ógnað þjóðaröryggi Bandaríkjanna, og byggja skaðabótakröfu sína á því.

Sjá má frétt BBC um málið hér.