Asískir kvenkylfingar vinna öll stórmótin

Jiyai Shin frá Suður-Kóreu sigraði með yfirburðum á opna breska meistaramótinu í golfi í kvennaflokki en mótinu lauk í gær. Shin lék lokahringinn á 73 höggum, eða einu höggi yfir pari, á Royal Liverpool vellinum við erfiðar aðstæður og sigraði hún með 9 högga mun. Inbee Park frá Suður-Kóreu varð önnur og Paula Creamer frá Bandaríkjunum varð þriðja.

Kylfingar frá Asíu hafa verið sigursælir á stórmótum í kvennaflokki í golfi á undanförnum mánuðum og í fyrsta sinn í sögunni hafa kylfingar frá Asíu titla að verja á öllum fjórum stórmótunum.

Sun Young Yoo frá Suður-Kóreu sigraði á Kraft Nabisco meistaramótinu, Shanshan Feng frá Kína sigraði á LPGA meistaramótinu. Na Yeon Choi frá Suður-Kóreu lék best allra á opna bandaríska meistaramótinu fyrr á þessu ári.

Sigur Shin er sá stærsti á opna breska meistaramótinu frá árinu 2001 þegar mótið varð aftur hluti af risamótaröðinni í kvennaflokki. Þetta er í annað sinn sem hún fagnar þessum titli en hún sigraði árið 2008 þegar mótið fór fram á Sunningdale vellinum.