Þórður Rafn vann Einvígið | Púttin voru að virka vel

Þórður Rafn Gissurarson úr Golfklúbbi Reykjavíkur vann í dag Einvígið á Nesinu í fyrsta sinn eftir bráðabana gegn Arnóri Inga Finnbjörnssyni á úrslitaholunni.

Mikil spenna var á lokasprettinum en Þórður Rafn spilaði frábærlega á honum, púttaði í nokkur skipti virkilega vel og var að lokum vel að sigrinum kominn.

Þórður og Arnór Ingi voru jafnir eftir níundu og síðustu holuna og þurfti því að grípa til bráðabana. Þar þurfti keppendur að skjóta úr glompu og sá sem var nær holu eftir glompuskotið var krýndur sigurvegari.

Högg Arnórs var afleitt og átti Þórður því ekki í miklum erfiðleikum að tryggja sér sigurinn.

Þórður var að vonum gríðarlega sáttur eftir sigurinn og sagði mótið eitt það skemmtilegasta á árinu.

„Þetta var rosalega gaman. Þetta mót hefur verið á listanum mínum sem ég ætla að vinna og er þetta því ánægjulegt. Ég var að spila á móti níu frábærum kylfingum og er ég því mjög sáttur með þetta," sagði Þórður Rafn.

Mótið er sérstakt en leikin er holukeppni og sagði Þórður að áherslurnar í leik hans væru vissulega öðruvísi en venjulega.

„Þetta ræðst mikið af því hvað hinir gera. Ef hinir keppendurnir voru að gera mistök þá reyndi maður að halda þessu öruggu. Maður var alltaf að skoða höggin hjá hinum og sjálfur að slá með það í huga," bætti Þórður við.

„Ég spilaði ekkert sérstaklega vel á köflum og voru púttin í rauninni það eina sem var að ganga vel. Mér tókst að setja niður nokkur mikilvæg pútt á lokasprettinum sem gerðu gæfumuninn," sagði Þórður.

„Þetta er eitt skemmtilegasta mót ársins og alltaf gaman að koma hingað. Ég er mjög ánægður með þetta," sagði Þórður Rafn Gissurarson, sigurvegari Einvígisins að lokum.

Mótið er góðgerðarmót Nesklúbbins og DHL og gefa þeir í sameiningu eina milljón króna til styrktar Neistanum, styrktarfélagi hjartveikra barna.

Úrslit í Einvíginu voru eftirfarandi:

1. Þórður Rafn Gissurarson, GR

2. Arnór Ingi Finnbjörnsson, GR

3. Nökkvi Gunnarsson, NK

4. Guðjón Henning Hilmarsson, GKG

5. Björgvin Sigurbergsson, GK

6. Kristinn Óskarsson, GS

7. Guðrún Brá Björgvinsdóttir, GK

8. Örn Ævar Hjartarson, GS

9. Hlynur Geir Hjartarson, GOS

10. Valdís Þóra Jónsdóttir, GL