Laxveiði fer hægt af stað

Orri Vigfússon, formaður Verndarsjóðs villtra laxa (NASF), segir erfitt að spá fyrir um laxveiðina hérlendis í sumar. Hann segir veiðina í ánum umhverfis Atlantshafið hafa farið hægt af stað.

Í samtali við Veiðivísi segir Orri að dauft hafi verið yfir ám í Skotlandi og Noregi. Sömu sögu megi reyndar segja um Írland og Spán en í Frakklandi hafi fyrir skömmu komið smá skot. Það hafi verið í ám á Bretaníuskaga. Hann segir að í norðvesturhluta Rússlands hafi ástandið verið aðeins skárra. Ár sem renni á Kólaskaganum í Hvítahaf hafi gefið vel í byrjun vertíðar.

Töluvert hefur verið rædd um góða byrjun á laxveiðinni hérlendis í sumar og margir bjartsýnir á gott veiðisumar. Orri deilir ekki endilega þeirri skoðun. Hann segir að erfitt sé að spá fyrir um sumarið því enn sé lítið að marka aflatölur úr íslenskum ám.