Egils Gull mótið tafðist vegna veðurs - stefnt á að klára 36 holur í dag

Egils Gull mótið sem er annað stigamót ársins á Eimskipamótaröðinni hófst í morgun klukkan tíu í Vestmannaeyjum en vegna veðurs frestaði mótstjórn ræsingu um tvo og hálfan tíma.

Alls eru 84 keppendur mættir til leiks og mótið er því fullskipað en áætlað var að leika 36 holur í dag og 18 á morgun. Þó að aðstæður hafi lagast talsvert er enn töluverður vindur og eru aðstæður því erfiðar fyrir kylfingana. Hægt er að fylgjast með skori keppenda með því að fara inn á www.golf.is/skor og m.golf.is/skor.

Meðal keppenda eru þeir Stefán Már Stefánsson GR og Þórður Rafn Gissurarson en þeir luku leik á fimmtudaginn á Land Fleesensee Classic mótinu sem fram fór í Þýskalandi. Báðir léku þeir lokahringinn í mótinu á 70 höggum eða tveimur höggum undir pari.

Mótið er hluti af þýsku EPD-mótaröðinni. Þórður Rafn varð í 24. sæti í mótinu á samtals tveimur höggum undir pari. Hann fékk fimm fugla, einn skolla og einn tvöfaldan skolla á hringnum í dag. Árangurinn hjá Þórði er hans besti á mótaröðinni í ár. Stefán Már varð í 36. sæti á samtals einu höggi yfir pari og lyfti sér upp töfluna með hring dagsins.