Bubbi lét húðflúra laxaflugu á handlegginn

Bubbi Morthens hefur látið húðflúra klassísku útgáfuna af Green Highlander laxaflugunni á vinstri handlegginn.

"Ég gerði þetta nú bara fyrir fjórum tímum enda sést það vel á myndinni sem var tekin áðan. Það er smá blóð í henni," sagði Bubbi þegar Veiðivísir hafði samband við hann. "Nú er ég með lax á hægri handleggnum og Green Highlander á vinstri. Það var listamaðurinn Jón Páll hjá Íslensku húðflúrstofunni sem á heiðurinn af þessu verki."

Ástæðan fyrir því að Bubbi valdi Green Highlander er einföld.

"Þetta er uppáhaldsflugan mín enda stórlaxafluga sem á sér mikla sögu. Green Highlander reynist mér alltaf vel í Laxá í Aðaldal og ef ég man rétt þá fékk Völundur Hermóðsson vinur minn 29 punda lax á þessa flugu á Skerflúð á sjöunda áratugnum."

Bubbi segist nota klassísku útgáfuna af Green Highlander en hún er ein flóknasta laxaflugan sem hægt er að hnýta.

"Þegar ég nota þessa flugu nota ég bæði einkrækjur og tvíkrækjur. Einkrækjurnar eru gamlar breskar flugur sem mér áskotnaðist en tvíkrækjurnar eru hnýttar í Tælandi."

Eins og flestir vita er Bubbi með mörg húðflúr. En aðspurður segir hann "þetta eru einu tattúin sem ég er með sem tengjast veiðinni, hin tengjast rokkinu meira."