Síðasta skemmtikvöld SVFR

Síðasta skemmtikvöld þessa starfsárs verður haldið í sal SVFR á Háaleitisbraut á föstudaginn.

Á vef Stangaveiðifélags Reykjavíkur (https://svfr.is/) segir: „Næstkomandi föstudagskvöld verður síðasta opna hús þessa starfsárs. Í leiðinni verður félagsaðstaða SVFR á Háaleitisbrautinni kvödd formlega. Meðal annars mun verða spáð fyrir um laxveiðina í sumar.

Salur félagsins að Háaleitisbraut 68 hefur verið þungamiðja félagsstarfsins undanfarna áratugi, og það verður eflaust tregablandin stund fyrir eldri félaga að kveðja salarkynnin."

Dagskráin er á þessa leið:

• Jón Skelfir mun kynna fimm uppáhalds veiðistaðina sína.

• Guðni Guðbergs rýnir í veiðisumarið 2012 líkt og hann hefur gert undanfarin ár. Það verður spennandi að sjá hvað Guðni segir um komandi vertíð.

• Hilmar Hanson verður með ítarlega kynningu á nýju Guideline-vörunum.

• Hilmar Hansson og Ari Hermóður Jafetsson kynna veiðar á svæðunum kenndum við Tjörn og Árbót í Aðaldal.

• Veiðiflugur sjá um glæsilegan happahyl að þessu sinni.

Forsvarsmenn SVFR hvetja alla sem vettlingi geta valdið til þess að koma og kveðja Háaleitisbrautina og fagna sumrinu.