Haye og Chisora ætla að slást á Upton Park

Það gleymist seint er hnefaleikaköppunum Dereck Chisora og David Haye laust saman á blaðamannafundi eftir bardaga Chisora og Vitali Klitschko. Þeim bardaga tapaði Chisora sannfærandi.

Hann varð sér reyndar endalaust til skammar í aðdraganda bardagans og sló Klitschko meðal annars utan undir á blaðamannafundi.

Hann missti í kjölfarið hnefaleikaskírteinið sitt í Bretlandi. Haye er ekki heldur með hnefaleikaskírteini eftir að hafa lagt hanskana á hilluna.

Þeir ætla engu að síður að berjast á heimavelli West Ham, Upton Park, þann 14. júlí í sumar en það er hnefaleikasamband Lúxemborg sem viðurkennir bardagann. Breska hnefaleikasambandið gerir það ekki.

Þeir félagar verða eflaust talsvert í fréttum í aðdraganda bardagans sem klárlega verður skrautlegur.