Sjálfsagt höfðu ekki margir trú á því að Ítalinn Roberto Di Matteo myndi gera mikið úr tímabili Chelsea þegar hann tók við liðinu í upphafi marsmánaðar, eftir að Andre Villas-Boas var sagt upp störfum.
Di Matteo, sem lagði skóna á hilluna fyrir áratug síðan eftir að hafa spilað með Chelsea síðustu sex ár ferilsins, hefur komið flestum sparkspekingum í opna skjöldu með árangri sínum.
Hann hafði áður þjálfað tvö lið - MK Dons í neðri deildunum og West Bromwich Albion með misjöfnum árangri frá 2009 til 2011.
Svo var hann ráðinn sem aðstoðarmaður Villas-Boas í haust og var svo ráðinn til að stýra liðinu til loka tímabilsins eftir að Portúgalinn ungi var látinn fara fyrr í vetur.
Og eftir það hefur lið Chelsea blómstrað og Di Matteo er búið að koma liðinu í bæði úrslit ensku bikarkeppninnar og nú síðast Meistaradeildar Evrópu. Eiganda Chelsea, Roman Abramovich, hefur lengi dreymt um að vinna síðarnefndum keppnina og ljóst að Di Matteo á von á góðu ef það tekst á Allianz-leikvanginum í München þann 19. maí næstkomandi.
Tölurnar tala sínu máli. Chelsea hefur alls spilað fimmtán leiki síðan Di Matteo tók við og það á aðeins 51 degi. Leikjaálagið hefur því verið gríðarlegt. En liðið hefur samt unnið tíu af þessum leikjum og aðeins tapað einum - fyrir Manchester City í deildarleik þann 21. mars.
Chelsea á fjóra deildarleiki eftir á tímabilnu og ljóst að með þessu áframhaldi eru þeir líklegir til að koma sér í hóp fjögurra efstu liða og þar með tryggja sér þátttökurétt í Meistaradeildinni á ný - það er að segja ef þeim tekst þá ekki að vinna úrslitaleikinn í vor.
Úrslit leikja Chelsea undir stjórn Di Matteo:
4. mars: Birmingham - Chelsea 0-2 (bikar)
10. mars: Chelsea - Stoke 1-0 (deild)
14. mars: Chelsea - Napoli 4-1 (Meistaradeild)
18. mars: Chelsea - Leicester 5-2 (bikar)
21. mars: Manchester City - Chelsea 2-1 (deild)
24. mars: Chelsea - Tottenham 0-0 (deild)
27. mars: Benfica - Chelsea 0-1 (Meistaradeild)
31. mars: Aston Villa - Chelsea 2-4 (deild)
4. apríl: Chelsea - Benfica 2-1 (Meistaradeild)
7. apríl: Chelsea - Wigan 2-1 (deild)
9. apríl: Fulham - Chelsea 1-1 (deild)
15. apríl: Tottenham - Chelsea 1-5 (bikar)
18. apríl: Chelsea - Barcelona 1-0 (Meistaradeild)
21. apríl: Arsenal - Chelsea 0-0 (deild)
24. apríl: Barcelona - Chelsea 2-2 (Meistaradeild)
Árangur:
15 leikir á 51 degi
10 sigrar, 4 jafntefli, 1 tap.
Markatala: 31-13
Deild: 3 sigrar, 3 jafntefli, 1 tap.
Bikar: 3 sigrar, 0 jafntefli, 0 töp.
Meistaradeild: 4 sigrar, 1 jafntefli, 0 töp.
Ótrúleg velgengni Chelsea undir stjórn Di Matteo
