Stjörnuleikur NFL-deildarinnar hugsanlega lagður af

Bandarískir fjölmiðlar greina frá því í dag að yfirmenn NFL-deildarinnar séu að íhuga það alvarlega að leggja stjörnuleik deildarinnar, Pro Bowl, af á næsta ári.

Líkt og í fleiri íþróttum er stjörnuleikur NFL-deildarinnar hálfgerður brandari. Farið var með þann brandara alla leið á þessu ári þegar sérstakar tölvur voru settar á hliðarlínuna svo leikmenn gætu notað Twitter meðan á leiknum stóð.

Síðustu ár hefur leikurinn farið fram viku fyrir Super Bowl sem gerir það að verkum að leikmenn Super Bowl-liðanna geta ekki tekið þátt.

Leikurinn er hættur að skapa almennilegar tekjur og er dýr þar sem spilað er á Hawaii. Hann fær þó enn gott sjónvarpsáhorf þó svo áhorfið hafi fallið um 8,1 prósent á síðasta ári. Leikurinn var samt vinsælasta íþróttaefnið þá helgina.