Íris fór úr hnjálið í sigri Hauka

Haukakonur eru komnar í 2-0 á móti Íslands- og deildarmeisturum Keflavíkur eftir 73-68 sigur í öðrum undanúrslitaleik liðanna í Iceland Express deild kvenna í kvöld. Haukar náðu að landa sigrinum þrátt fyrir að missa einn sinn besta leikmann upp á sjúkrahús í fyrri hálfleik og vantar nú aðeins einn sigur til þess að komast í úrslitaeinvígið um Íslandsmeistaratitilinn.

Þegar rétt rúmlega þrjár mínútur voru liðnar af öðrum leikhluta ætlaði Íris Sverrisdóttir leikmaður Hauka í sniðskot eftir hraðaupphlaup en varð fyrir því áfalli að fara úr og aftur í lið á hægra hné.

Uppi varð fótur og fit og kom Henning Hennings aðstoðarþjálfari Hauka hlaupandi að áhorfendapöllunum og hrópaði hvort læknir væri í húsinu og bað um að hringt yrði á sjúkrabíl.

Það var sjúkraliði í húsinu sem gat hugað að Írisi á meðan beðið var eftir sjúkrabílnum sem tók um 20 mínútur að komast á völlinn.

Tæplega hálftíma hlé þurfti að gera á leiknum vegna meiðsla Írisar.