Lið & ökumenn: Mercedes, Lotus og Force India

Keppnistímabilið 2012 hefst á sunnudaginn þegar ástralski kappaksturinn verður ræstur í Melbourne. Það er langt síðan búist var við jafn jafnri og harðri keppni í Formúlú 1. Vísir hitar upp fyrir fyrsta mótið í vikunni og byrjar á kynningum á liðum og ökumönnum.

Alls munu tólf lið ræsa í Ástralíu. Þau eru Red Bull, McLaren, Ferrari, Mercedes, Lotus, Force India, Sauber, Torro Rosso, Williams, Caterham, HRT og Marussia. Tímabilið spannar 20 mót og hafa þau aldrei verið fleiri á einu tímabili.

Viku eftir ástralska kappaksturinn er flogið til Malasíu og ekið á Sepang brautinni.

Smellið á myndirnar til að sjá þær stærri.

Mercedes AMG Petronas F1

Á blaði er mannskapur Mercedes liðsins sá sigursælasti í Formúlu 1. Michael Schumacher hefur sigrað 91 mót á fyrri hluta ferils síns og Ross Brawn hefur gert lið sín að heimsmeisturum sjö sinnum á ferlinum. Nico Rosberg hefur þó aldrei sigrað mót á þeim sex árum sem hann hefur ekið í mótaröðinni. Nú hefst þriðja ár endurkomu Mercedes-Benz framleiðandans í Formúlu 1 og gert er ráð fyrir að árangur náist fljótt. Þetta er jafnframt þriðja ár endurkomu Michael Schumachers.

Undirbúningstímabilið hefur gengið vel og er talið að Mercedes liðið verði í baráttunni um þriðja sætið í heimsmeistarakeppninni. Gera má ráð fyrir því að ef Schumacher fær öflugan bíl er hann líklegur til vinnings. Liðsfélaginn Rosberg er ungur og hungraður, þráir ekkert heitar en sigur.

Lotus F1 Team

Liðið sem hét Renault fyrir tveimur árum og Lotus-Renault í fyrra heitir í ár Lotus. Svartir og gulllitaðir bílar þeirra er vísun í gullöld gamla Lotus liðsins. Þá ók þar Ayorton nokkur Senna. Í dag ekur Kimi nokkur Raikkonen fyrir Lotus sem snýr aftur í Formúlu 1 eftir að hafa náð takmarki sínu með Ferrari liðinu árið 2007 og orðið heimsmeistari. Kimi hefur örugglega saknað félaga sinna í formúlunni (eða peningana sem þeir borga honum). Liðsfélagi hans verður Romain Grosjean. Sá hefur áður fengið tækifæri fyrir liðið, síðast þegar það hét Renault árið 2009. Þá ók hann í sjö síðustu mótum ársins og bætti sig jafnt og þétt. Síðan hefur hann verið reynsluökuþór liðsins.

Undirbúningstímabil Lotus hefur gengið mjög vel. Þeir hafa raunar átt óvætustu framfarir ársins. Frumlegur bíll þeirra í fyrra var fljótur framan af en missti af lestinni þegar á leið. Bíllinn í ár virðist vera mjög fljótur þó það vanti örlítið upp á áreiðanleika. Kimi Raikkonen gæti jafnvel átt möguleika í ár.

Sahara Force India F1 Team

Hjá Force India munum við sjá mjög áhugavert einvígi tveggja ungra og blóðþystra ökuþóra, þeirra Paul di Resta frá Skotlandi og Nico Hülkenberg frá Þýskalandi. Báðir hafa ekið í 19 mótum í Formúlu 1, Paul fyrir Force India í fyrra en Nico fyrir Williams fyrir tveimur árum. Sá síðarnefndi hefur nú eytt heilu ári sem reynsluökuþór Force India og vill sanna að það hafi verið rétt ákvörðun að ráða hann í keppnissætið.

Þeir segja að í ár hafi þeir smíðað besta Force India bílinn hingað til. Liðið er byggt á grunni Jordan liðsins sem Eddie Jordan seldi um miðan síðasta áratuginn. Indverski auðjöfurinn Vijay Mallya dælir gríðarlegu fjármagni í liðið og hefur það tekið mörg jákvæð skref fram á við undanfarin ár. Force India mun að öllum líkindum berjast um hið mikilvæga fjórða sæti í ár við Lotus, Ferrari og Mercedes.