Þórsarar unnu mikilvægan sigur á Keflavík

Þór frá Þorlákshöfn vann í kvöld góðan sigur á Keflavík í Iceland Express-deild karla, 75-65. Þá unnu Tindastóll og KR sigur í sínum leikjum.

Darren Govens var stigahæstur hjá Þórsurum með 22 stig en Blagoj Janev kom næstur með 21. Hjá Keflavík skoraði Jarryd Cole flest stig eða 24 talsins.

Þórsarar náðu góðri forystu í fyrri hálfleik og leiddu að honum loknum, 42-30. Þetta bil náðu Keflvíkingar ekki að brúa í seinni hálfleik. Keflavík náði að minnka muninn í tvö stig, 67-65, þegar tæpar þrjár mínútur voru eftir. En Þór skoraði síðustu átta stig leiksins og tryggði sér þar með tíu stiga sigur.

Eftir sigurinn eru nú fjögur lið jöfn að stigum í 2.-5. sæti deildarinnar með 22 stig - Stjarnan, Þór, Keflavík og KR.

Tindastóll vann þrettán stiga sigur á Val, 74-61, eftir að hafa verið þremur stigum yfir í hálfleik. Þar skoraði Friðrik Hreinsson flest stig, nítján talsins fyrir Tindastól, en hjá Val var Marvin Jackson stigahæstur með átján stig en hann tók þar að auki fjórtán fráköst.

Tindastóll komst upp í sjöunda sætið með sigrinum og er liðið með sextán stig, rétt eins og Njarðvík sem er í áttunda sæti. Valur er sem fyrr á botni deildarinnar, án sigurs.

KR-ingar tóku á móti Fjölnismönnum í vesturbæ Reykjavíkur og höfðu öruggan sigur, 106-82. Fjölnismenn féllu niður í níunda sæti deildarinnar með tapinu.

Úrslit:

Valur - Tindastóll 61-74 (36-39)

Stig Vals: Marvin Jackson 18/14 fráköst, Birgir Björn Pétursson 14, Kristinn Ólafsson 13, Hamid Dicko 4, Alexander Dungal 4, Snorri Þorvaldsson 4, Ragnar Gylfason 2, Benedikt Blöndal 2.

Stig Tindastóls: Friðrik Hreinsson 19, Curtis Allen 15/10 fráköst, Þröstur Leó Jóhannsson 14, Svavar Atli Birgisson 8, Igor Tratnik 8, Maurice Miller 6, Helgi Freyr margeirsson 2, Helgi Rafn Viggósson 2.

Þór Þorl. - Keflavík 75-65 (42-30)

Stig Þórs: Darrin Govens 22, Blagoj Janev 21, Matthew Hairston 15/20 fráköst, Guðmundur Jónsson 10, Darri Hilmarsson 7.

Stig Keflavíkur: Jarryd Cole 24, Charles Parker 15/10 fráköst, Kristoffer Douse 9, Magnús Þór Gunnarsson 6, Halldór Örn Halldórsson 6, Valur Orri Valsson 3, Arnar Freyr Jónsson 2.

KR - Fjölnir 106-82