Umfjöllun og viðtöl: KR - Snæfell 93-94

Snæfellingar unnu dramatískan sigur á KR í 13. umferð Iceland Express-deildar karla í körfuknattleik í Vesturbænum í kvöld. Þar með er sigurgöngu KR-inga á árinu 2012 lokið.

KR-ingar höfðu frumkvæðið í fyrri hálfleik og leiddu með ellefu stigum í hálfleik. Í síðari hálfleik áttu heimamenn í mestu vandræðum með vörn gestanna. Með Nonna Mæju í broddi fylkingar jöfnuðu gestirnir metin og tryggðu sér að lokum sætan sigur 93-94.

Eftir tvíframlengda viðureign liðanna í Vesturbænum á mánudag var ekki von á öðru en hníjöfnum leik. Ekki var útlit fyrir annað í fyrsta leikhluta. Snæfellingar ætluðu greinilega að hafa góðar gætur á Joshua Brown sem skoraði 49 stig gegn þeim í síðasta leik. Þeim tókst það ágætlega og jafnt var á flestum tölum. Heimamenn leiddu þó með tveimur stigum að leikhlutanum loknum, 22-20.

Heimamenn með þá Finn Atla Magnússon og Robin Ferguson í broddi fylkingar tóku frumkvæðið í öðrum leikhluta. Joshua Brown lét einnig að sér kveða í auknum mæli og KR-ingar juku forystuna. Dejan Sencanski setti niður fallegan þrist undir lok hálfleiksins og heimamenn leiddu með ellefu stigum þegar gengið var til búningsklefa, 53-42.

Í stöðunni 24-22 í fyrri hálfleik fékk Ingi Þór Steinþórsson, þjálfari Snæfells, dæmda á sig tæknivillu að því er hann vildi meina fyrir litlar sakir. Hvort það hafi haft áhrif á taktinn í leik gestanna í leikhlutanum skal ósagt látið.

Gestirnir úr Stykkishólmi mættu ákveðnir til leiks í síðari hálfleik. Fremstur í flokki fór Jón Ólafur Jónsson betur þekktur sem Nonni Mæju. Hann skoraði átta af fyrstu tíu stigum gestanna sem minnkuðu smátt og smátt muninn. KR-ingar áttu í miklum vandræðum með að finna lausnir í sókninni og töpuðu boltanum ítrekað á klaufalegan hátt.

Í stöðunni 61-54 ætlaði allt um koll að keyra. Svo virtist sem Sencanski í liði KR hefði slegið til Quincy Hankins-Cole og þurfti að ganga á milli þeirra. Uppskar hvor sína villuna. Uppákoman virtist nýtast gestunum ágætlega því þeir gengu á lagið og unnu leikhlutann með tíu stigum. Heimamenn leiddu þó með einu stigi fyrir fjórða leikhluta, 71-70.

Snæfell byrjaði lokaleikhlutann af krafti. Hankins-Cole tróð boltanum af miklum tilþrifum í tvígang og Nonni Mæju setti fallegan þrist. Í stöðunni 75-81 leist Hrafni Kristjánssyni, þjálfara KR, ekki á blikuna og tók leikhlé.

Í kjölfarið fór í gang þriggja stiga skotkeppni liðanna sem virtust aðeins hafa áhuga á þremur stigum í hverri sókn. Í stöðunni 84-89 fékk Nonni Mæju sína fimmtu villu. Við það hikstuðu gestirnir en enn ein troðsla Hankins-Cole kom þeim stigi yfir þegar um mínúta var eftir. Pálmi Sigurgeirsson skoraði úr tveimur vítaskotum þegar 15 sekúndur voru eftir og gestirnir með þriggja stiga forystu.

KR-ingar brunuðu í sókn en Sheldon-Hall stal boltanum af Joshua Brown og gestirnir tryggðu sér sigur á vítalínunni. Hreggviður Magnússon lagaði reyndar stöðuna með flautukörfu langt utan af velli en sigurinn var Snæfellinga.

KR-ingum voru mislagðar hendur í sóknarleiknum í kvöld, sérstaklega í síðari hálfleik. Þeir töpuðu boltanum alls 15 sinnum og átti Hreggviður Magnússon sérstaklega erfitt uppdráttar. Joshua Brown var stigahæstur með 23 stig og var heilt yfir bestur í liði KR.

Snæfellingar hljóta að vera í skýjunum með sigurinn. Þeir spiluðu hörkuvörn í síðari hálfleiknum og settu niður mikilvæg skot þegar þess þurfti. Þá kveikti Hankins-Cole í liði sínu með glæsilegum troðslum en Bandaríkjamaðurinn skoraði alls 27 stig í leiknum.

Maður leiksins var þó Nonni Mæju sem fór á kostum í upphafi síðari hálfleiks, setti niður mikilvæga þrista og gaf tóninn í varnarleiknum. Fjarvera hans undir lok fjórða leikhluta var nálægt því að kosta gestina sigurinn.

Sigurinn hlýtur að vera sérstaklega sætur fyrir Snæfellinga eftir dramatískt tap gegn KR í viðureign liðanna í Powerade-bikarnum á mánudaginn. Að leiknum loknum eru KR-ingar í 2.-4. sæti með 16 stig líkt og Stjarnan og Keflavík en hafa spilað leik meira. Snæfell er í 6. sæti með 14 stig.







KR-Snæfell 93-94 (22-20, 31-22, 18-28, 22-24)

KR: Joshua Brown 23/7 fráköst/5 stoðsendingar, Robert Lavon Ferguson 17/14 fráköst, Finnur Atli Magnusson 16/9 fráköst, Dejan Sencanski 14/7 fráköst, Hreggviður Magnússon 11, Martin Hermannsson 7, Ólafur Már Ægisson 3, Skarphéðinn Freyr Ingason 2..

Snæfell: Quincy Hankins-Cole 27/7 fráköst, Jón Ólafur Jónsson 22/9 fráköst/5 stoðsendingar, Marquis Sheldon Hall 17/5 stoðsendingar, Hafþór Ingi Gunnarsson 9, Pálmi Freyr Sigurgeirsson 6/6 fráköst, Sveinn Arnar Davidsson 6/5 fráköst, Ólafur Torfason 4, Óskar Hjartarson 3.

Nonni Mæju: Ákveðnir að borga fyrir tapið í bikarnum

Jón Ólafur Jónsson fór fremstur í flokki í liði gestanna og var kampakátur með sigurinn.

„Leikurinn á mánudaginn var hrikalega svekkjandi og við vorum alveg ákveðnir að borga fyrir það," sagði Jón Ólafur sem skoraði 22 stig og hirti 9 fráköst.

„Við ákváðum að spila vörnina af miklu meiri krafti í síðari hálfleik. Pressa þá stífar og láta þá hafa fyrir hlutanum," sagði Jón Ólafur sem fór af velli með sína fimmtu villu í stöðunni 84-89 og tæpar fjórar mínútur eftir. Við það hikstuðu gestirnir og KR-ingar gengu á lagið.

„Við vorum dálítið óskynsamir í lokin og flýttum okkur of mikið í sókninni. Það gengur ekki upp. Við erum miklu betri þegar við látum boltann ganga og spilum sem lið," sagði Nonni og hélt inn í klefa. Skömmu síðar heyrðist hátt og snjallt: „Snæfell, Snæfell, Snæfell."

Hrafn: Vörnin ekki nógu góð til að vinna

„Við vorum allt í lagi í fyrri hálfleik en mér fannst við samt aldrei spila nógu góða vörn til þess að vinna körfuboltaleik. Planið var að bæta vörnina í seinni hálfleik en það gekk svo sannarlega ekki eftir. Það er svolítið sárt," sagði Hrafn Kristjánsson, þjálfari KR, í leikslok.

KR-ingar töpuðu boltanum 15 sinnum í leiknum, oft á afar klaufalegan hátt.

„Við vorum bara með fjóra tapaða bolta í hálfleik. En margir af þessum töpuðu boltum voru mjög dýrir, á ögurstundu í seinni hálfleik," sagði Hrafn sem sagði mögulegt að um þreytu eða einbeitingarskort væri að ræða. Hann sagðist þó eiga sökina væru menn þreyttir inni á vellinum.

Umdeilt atvik gerðist í þriðja leikhluta þegar Sencanski, Serbinn í liði KR, virtist slá til Hankins-Cole í liði gestanna.

„Hann (Sencanski) bað mig afsökunar. Sagðist hafa misst stjórn á skapi sínu. Þessi ásetningsvilla var fyllilega verðskulduð. Hann sagðist hafa fengið olnboga í hálsinn en í hita leiksins er erfitt að greina hvort það sé viljandi eða ekki," sagði Hrafn.