Alltaf fíkjuábætir á jólunum

Báðir þessir eftirréttir eru hátíðlegir jólaréttir; einfaldir úr góðum uppskriftum og hreint sælgæti að njóta," segir Friðgeir Ingi Eiríksson, matreiðslumeistari á Hótel Holti, sem hér gefur uppskriftir að dýrindis eftirréttadásemdum sem fullkomna jólamáltíðina.

„Vínlegna peran svíkur engan í bragðgæðum og er undurfögur fyrir augað, en hinn ábætinn bjuggum við til frá grunni fyrir jólin í fyrra og hefur síðan verið í miklu dálæti okkar sem og gesta, og ekki séns að ég bjóði annað en fíkjuábæti í eftirrétt á aðfangadagskvöld," segir Friðgeir en eftirrétturinn sá er borinn fram í glösum til að ná fram tilætluðum áhrifum.

„Fíkjuábætinum er raðað af ásetningi í fastmótaðri röð í ábætisglös svo hægt sé að smakka allt hráefnið í einu, en áhrifin þurfa að saman­standa af fullkomnun í mismunandi áferð; mjúkri, kældri, ferskri, frosinni og stökkri," segir Friðgeir sem kennt hefur áhugasömum sælkerum eftirréttagerð og aðra veislumatseld á vikulegum matreiðslunámskeiðum Hótel Holts við miklar vinsældir og ávallt notað súkkulaði frá Síríus og Nóa í ábætinn.

„Það er greinilegt að Íslendingar eru orðnir nýjungagjarnari þegar kemur að forréttum, meðlæti og eftirréttum á jólum, á sama tíma og þeir vilja halda fast í hefðir þegar kemur að jólakjötinu."

Súkkulaðimús

300 ml rjómi

250 g súkkulaði

100 g eggjarauður

145 g sykur

200 ml mjólk

2 blöð matarlím

Hitið upp mjólk, og sláið sykri og eggjarauðum saman. Heitri mjólkinni hellt yfir. Því næst er lagað enskt krem: Hitið á vægum hita þar til þykknar. Matarlím lagt í bleyti. Þegar límið er orðið lint er það sett út í enska kremið. Bræðið súkkulaði í vatnsbaði eða örbylgjuofni, og blandið saman við enska kremið.

Marengs

150 g eggjahvítur

140 g sykur

140 g flórsykur

Þeytið eggjahvítur hægt og hellið hvítum sykri rólega saman við. Þegar blandan er orðin þykk og stíf, sigtið þá flórsykur út í.

Bakið við 120°C í 20 mínútur.

Kirsuberjalögur

200 g kirsuberjalögur

50 ml rauðvín

50 g sykur

safi úr ½ sítrónu

mynta

150 g vatn

3 fíkjur

Blandið öllu nema fíkjum saman í pott og sjóðið. Hellið svo yfir skornar fíkjur og geymið.

Crumble

100 g smjör

100 g púðursykur

100 g hveiti

100 g heslihnetur

vanilluís

Skerið smjörið niður í teninga og hafið kalt. Blandið öllum þurrefnum saman og svo smjöri. Blandið þessu saman með höndunum. Hér má einnig nota matvinnsluvél með spaða. Myljið niðurskornar hneturnar saman við og kælið vel.

Bakið á bökunarplötu með smjörpappír eða í viðeigandi formi þar til deigið er fullbakað.

Perur

4 stk. perur

600 ml rauðvín

200 ml appelsínusafi

½ stk. kanilstöng

125 g sykur

2 stk. negulnaglar

1 msk. pistasíur

Sjóðið upp á vökvanum ásamt öllu kryddi. Leggið þá perur út í og sjóðið við væga suðu í u.þ.b. 35 mínútur. Kælið vökvann, takið um 1 dl af honum og sjóðið niður í síróp. Saxið pistasíur, penslið sírópi á perurnar og stráið pistasíum yfir.

Krem bakarans

568 g mjólk

144 g sykur

108 g hveiti

72 g smjör

5 stk. eggjarauður

½ vanillustöng

Soðið upp á mjólk og sykri. Eggjarauður settar út í, því næst er hveiti sigtað saman við og þurr­kryddum blandað við í lokin.

Kanilkex

Hnífsoddur af engifer

Hnífsoddur af anís

Hnífsoddur af kardimommum

175 g hveiti

100 g smjör

50 g sykur

30 g kornflex

30 g eggjahvíta

10 g kanill

Sykri og smjöri blandað saman og því næst er afgangnum blandað saman við í hrærivél en gætið þess að nota ekki þeytara, heldur spaða eða krók. Borið fram með vanilluís.