FH-ingar í ham gegn Valsmönnum

FH vann sannfærandi sigur á Val 34-24 í N1-deild karla í kvöld. Með góðum kafla í fyrri hálfleik náði liðið öruggri forystu sem það lét aldrei af hendi.

FH-ingar voru með undirtökin í fyrri hálfleiknum og höfðu 17-13 forystu að honum loknum. Í stöðunni 2-3 var eina skiptið sem Valur hafði yfir í leiknum en eftir það kom 7-1 kafli hjá FH-ingum sem breyttu stöðunni í 9-4. Þá var þjálfurum Valsliðsins nóg boðið og tóku leikhlé.

En það gekk erfiðlega hjá gestunum að finna glufur á vörn heimamanna, það var bara Anton Rúnarsson sem var að finna leiðina að markinu.

Á lokakafla fyrri hálfleiks misstu dómarar leiksins, Gísli og Hafsteinn, tökin og reyndu sitt á hvað að bæta fyrir mistök sem þeir höfðu gert með undarlegum ákvörðunum. Vakti það litla hrifningu hjá leikmönnum beggja liða en dómararnir gátu andað léttar þegar hálfleikurinn kom en þeir stóðu sig talsvert betur eftir hlé.

Valsmenn mættu ákafir til leiks í seinni hálfleik en Hafnfirðingar héldu einbeitingu vel og hleyptu þeim ekki nálægt sér. Daníel Andrésson kom í markið hjá heimamönnum og varði vel. Hlíðarendaliðið gerði of mörg mistök í sóknarleiknum og opnuðu leiðir fyrir hraðaupphlauðsmörk andstæðingana sem á endanum lönduðu tíu marka sigri.

Markahæstir hjá FH voru Ásbjörn Friðriksson með 9 mörk og stórskyttan Ólafur Guðmundsson með 8 mörk. Sjónvarpsstjarnan Anton Rúnarsson var langatkæðamestur Valsmanna með 9 mörk.

FH - Valur 34-24 (17-13)



Mörk FH (skot): Ásbjörn Friðriksson 9/1 (12/1), Ólafur Guðmundsson 8 (11), Halldór Guðjónsson 5 (7), Baldvin Þorsteinsson 4 (7), Atli Rúnar Steinþórsson 3 (5), Örn Ingi Bjarkason 2 (3), Hjörtur Hinriksson 1 (1), Ólafur Gústafsson 1 (1), Benedikt Kristinsson 1 (1).

Varin skot: Daníel Andrésson 10/1, Pálmar Pétursson 8/1.

Hraðaupphlaup: 8 (Ólafur 4, Baldvin 2, Halldór 2)

Fiskuð víti: 1 (Atli Rúnar)

Utan vallar: 8 mínútur.

Mörk Vals (Skot): Anton Rúnarsson 9/1 (11/1), Ernir Hrafn Arnarson 5/1 (10/2), Valdimar Fannar Þórsson 3 (7), Orri Freyr Gíslason 2 (3), Heiðar Þór Aðalsteinsson 2 (3), Alex Jedic 2 (6), Sturla Ásgeirsson 1 (4/1), Einar Örn Guðmundsson 0 (1).

Varin skot: Hlynur Morthens 10, Friðrik Þór Sigmarsson 3.

Hraðaupphlaupsmörk: 2 (Anton, Sturla)

Fiskuð víti: 4 (Hjálmar Arnarson, Orri, Einar, Ernir)

Utan vallar: 6 mínútur.