Björgvin Hólmgeirsson dæmdur í eins leiks bann

Björgvin Þór Hólmgeirsson verður ekki með Haukaliðinu á móti HK í N1 deild karla á morgun því hann var dæmdur í eins leiks bann af Aganefnd HSÍ í gær.

Björgvin fékk rautt spjald á síðustu mínútunni í leik Selfoss og Hauka á fimmtudaginn var en leikurinn endaði með 25-25 jafntefli.

Björgvin er markahæsti leikmaður Hauka í vetur með 68 mörk í 12 leikjum eða 5,7 mörk að meðaltali í leik. Hann skoraði níu mörk í fyrri leiknum á móti HK á tímabilinu.

Leikur Hauka og HK er gríðarlega mikilvægur enda liðin jöfn að stigum í 4. og 5. sæti en fjögur efstu sætin gefa sæti í úrslitakeppninni í vor.