Framarar segja að Markús Máni hafi verið ólöglegur

Framarar hafa ákveðið að gera lokatilraun til þess að komast í bikarúrslitaleik karla í handbolta. Fram hefur kært Val því félagið heldur því fram að Markús Máni Michaelsson hafi verið ólöglegur í undanúrslitaleiknum. Þetta kemur fram á mbl.is í kvöld.

Markús Máni birtist óvænt í vörn Vals í leiknum en hann hefur ekkert spilað með liðinu í vetur.

Framarar vilja meina að Markús hafi ekki verið með gilda leikheimild né á leikmannasamningi hjá Val þegar leikurinn fór fram.

Dómstóll HsÍ mun taka málið fyrir og vinna hratt enda fer úrslitaleikurinn fram 26. febrúar. Að öllu óbreyttu spila Akureyri og Valur leikinn.