Grinderman hætt störfum

Tónlistarmaðurinn Nick Cave hefur tilkynnt um endalok hljómsveitarinnar Grinderman.

„Grinderman er búin að vera. Þetta er búið spil,“ sagði hann uppi á sviði á tónlistarhátíðinni Meredith Music Festival í Ástralíu. „Sjáumst eftir tíu ár þegar við verðum orðnir enn þá eldri og ljótari,“ bætti hann við. Eftir það gekk hljómsveitin af sviðinu og vissu áhorfendurnir, sem voru um tólf þúsund, ekki hvaðan á þá stóð veðrið.

Grinderman var stofnuð árið 2006 og hefur hún gefið út tvær plötur. Auk Cave voru í sveitinni þeir Warren Ellis, Martyn Casey og Jim Sclavunos.