Syngur um íslensku konuna á fyrstu sólóplötunni

Valur var eitt sinn kenndur við hljómsveitina Buttercup, en sendir frá sér fyrstu sólóplötuna á næstunni. Valur segir rólega stemningu á plötunni.

„Ég er að vinna með svo miklum snillingum þannig að það er ekkert víst að þetta klikki,“ segir tónlistarmaðurinn Valur Heiðar Sævarsson.

Um mánaðamótin kemur út fyrsta sólóplata Vals og hefur hún fengið nafnið Íslenska konan. Valur hefur oft verið kenndur við hljómsveit sína Buttercup, sem naut mikilla vinsælda þegar íslenska sveitaballapoppið var hvað mest áberandi í kringum aldamót. Nú vendir hann kvæði sínu í kross, en tónlistin á sólóplötunni á lítið skylt við fjörugt sveitaballapoppið.

„Já, þetta er allt öðruvísi fílingur. Það er rólegheita-rauðvínsstemning yfir þessari plötu – allt í frekar rólegu tempói. Þetta er allt önnur pæling.“

Myndi tónlistin ekki ganga í Njálsbúð?

„Nei, ég held ég geti fullyrt það. Ekki nema þá kannski fyrir gamla fólkið,“ segir Valur í léttum dúr.

Sagan á bak við titil plötunnar hefst í jarðarför ömmu Vals, þar sem hann flutti einmitt lagið Íslenska konan. „Í kjölfarið fór ég að hugleiða þetta og fékk þá hugmynd að búa til smá þemaplötu um þetta yrkisefni. Það tvinnast allt inn í þetta, hvernig upplifun mín af íslensku konunni hefur verið. Það er ýmislegt sem gerist. Það fylgir henni bæði ljós og myrkur. En aðallega ljós, sem betur fer.“

Valur hefur eytt ári í gerð plötunnar sem átti upphaflega að vera einfaldari en raunin varð. „Það fór að hlaðast utan um hana,“ segir Valur. „Þetta er miklu stærri og flottari plata en ég lagði upp með. Sum lög fengu meiri dýpt en ég hélt að væri mögulegt. Það kom einhver andi yfir menn.“

atlifannar@frettabladid.is