Persónulegar gjafir

Prentlausnir þjónusta einstaklinga og fyrirtæki, stór og smá með stafræna prentun og frágang á prentgripum. Að sögn Þórs Þorsteinssonar, annars eigenda Prentlausna, nýtur forrit á vefsíðu fyrirtækisins mikilla vinsælda um þessar mundir en það gerir notendum kleift að búa til eigin jólakort, dagatöl og myndaalbúm með tiltölulega lítilli fyrirhöfn. „Forritið er amerískt og kallast Digilaps. Fyrir utan að vera svo notendavænt að afi gamli og amma geta nýtt sér það leikandi létt, er búið að þýða forritið á íslensku og hægt að hlaða því beint á tölvu notenda sem veldur því að vinnslan er hröð, miklu hraðari en þegar fólki gefst kostur að nota svona forrit á netinu,“ bendir Þór á. þegar búið að er sækja forritið á heimasíðu Prentlausna á slóðina prentlausnir.is segir Þór þrjá fyrrnefnda valkosti bjóðast. „Sá fyrsti er að gera jólakort og hægt að skreyta það með eins mörgum myndum og mann langar til, bæði inn í og á bakinu,“ segir hann og getur þess að valið standi milli tveggja stærða, A5 og A6. „Kortið er svo hægt að fá með broti ef maður vill og umslag fylgir alltaf með.“ Annar valmöguleiki er að setja saman dagatal í forritinu. „Þar er líka hægt að hafa frjálsar hendur með fjölda mynda og jafnvel setja eina mynd í bakgrunn,“ segir hann. „Svo gefst sá kostur að setja inn á einum stað í forritinu nöfn einstaklinga, afmælisdaga og myndir af viðkomandi og þá birtist allt saman sjálfkrafa inni í dagatalinu.“ Loks nefnir Þór albúmin til sögunnar. „Sem geta verið eins myndskreytt og fólk vill, án eða með texta sem það fyllir sjálft inn og farið upp í allt að 200 blaðsíður í fjórum stærðum: A4 langsniði, A4 standandi, 28 x 28 eða 21 x 21 sentimetra,“ segir hann og getur þess að rétt eins og í fyrrnefndum tilvikum þurfi að vista endanlega útkomu og senda rafrænt til Prentlausna sem annist allan frágang þegar greitt hefur verið með greiðslukorti. „Eftir það gengur allt mjög hratt fyrir sig, sérstaklega þegar um minni upplög er að ræða og svo gefum við fólki kost á að sækja pakkann eða fá hann sendan til sín.“