Noel enn hundfúll

Noel Gallagher segir það útilokað að hann komi aftur fram með hljómsveitinni Oasis. Rætt hefur verið um að sveitin fagni 20 ára afmæli plötunnar (What‘s the Story) Morning Glory? árið 2015 með tónleikum en Noel hyggst ekki taka þátt í þeim. Bróðir hans Liam megi hins vegar vel halda slíka tónleika kjósi hann svo.

„Hann má spila plötuna ef hann vill. Mér er sama,“ segir Noel. Liam hafði áður lýst yfir áhuga á að koma aftur fram með bróður sínum.

Noel hætti í Oasis árið 2009 eftir rifrildi við bróður sinn. „Það er ástæða fyrir því að ég hætti í hljómsveitinni og hún stendur enn,“ segir Noel, sem gaf á dögunum út fyrstu sólóplötu sína. Liam gaf fyrir skemmstu út plötu með hljómsveitinni Beady Eye.