HAM á Iceland Airwaves: Díselvélin

Ham. Hafnarhúsið. Díselvélin

Hljómurinn í Hafnarhúsinu á föstudagskvöld var lélegur. Það kom lítið niður á tónleikum HAM sem er einhvers konar þungarokkvél. Vélin hökktir lítið og keyrir áfram á díselolíu með tilheyrandi hávaða og látum. Lögin Dauð hóra, Mitt líf og Ingimar eru orðin klassík, þrátt fyrir að stutt sé síðan þau komu út á plötu og áhorfendur sungu með af lífsins sálar kröftum.

HAM er stórkostleg hljómsveit og flutti stóran hluta af nýju plötunni, Svik, harmur og dauði. Hljómsveitin blandaði eldra efni smekklega saman við svo úr varð bragðgóður rokkgrautur. David Fricke, aðalritstjóri Rolling Stone, mætti á svæðið og spurður hvernig hann kunni að meta HAM sagðist hann elska hljómsveitina, sem hann var að sjá í fyrsta skipti. Það skildi þó ekki fara svo að HAM yrði „meikhljómsveit" Iceland Airwaves í ár, 25 árum of seint? - afb