Bara holl samkeppni

„Nei, við erum ekki samlokutýpur, en við við höfum alltaf verið óhræddar við að leita ráða hvor hjá annarri," segja þær Agla Stefánsdóttir og Sigrún Unnarsdóttir, fatahönnuðir og tveir fjögurra Íslendinga sem luku Mastersnámi við Designskolen í Kolding nú í vor.

Spurðar hvort samkeppni hafi kannski verið á milli þeirra tveggja í náminu svara þær létt að seint verði komist hjá samkeppni í tískubransanum. „Við virðum skoðanir hvor annarrar og milli okkar bekkjarsystranna allra er einungis holl samkeppni, það er betra fyrir heildina ef öllum gengur vel. Við erum allar með mismunandi stíl og áherslur en hjá okkur tveim er húmorinn aldrei langt undan og báðar erum við gjarnar á að segja sögur í gegnum flíkurnar. Ferlið er því alltaf jafn spennandi og útkoman."

Að útskriftarsýningu skólans í Kolding lokinni taka við spennandi verkefni hjá þeim báðum, meðal annars á Copenhagen Fashionweek. Sigrún Halla hefur auk þess verið valin til að taka þátt í Designers Nest, samkeppni fatahönnunarnema á Norðurlöndunum og í ágúst er von á þeim báðum heim á Fljótsdalshérað þar sem þær taka þátt í verkefninu Norðaustan10, vöruþróunarverkefni á vegum sveitarfélagsins og Nýsköpunarmiðstöðvar Íslands.

En verða þær þá alkomnar heim? „Sigrún flytur heim á klakann, tilbúin að takast á við að koma efnahagnum aftur á réttan kjöl en ég flyt til Kaupmannahafnar til að halda Dönunum við efnið," segir Agla.

heida@frettabladid.is