Búfé og gróður ættu að sleppa úr öskunni

„Það er erfitt að segja til um þetta núna því það er ekki búið að fá niðurstöður um hversu mikið sé af flúor og slíku í öskunni,“ segir Jón V. Jónmundsson sauðfjárræktarráðunautur um áhrif öskunnar úr Grímsvötnun og búfé og gróður.

Fram kom í gær að fyrstu athuganir bentu til þess að ekki sé mikill flúor í öskunni. Jón segir reynsluna frá gosinu í Eyjafjallajökli þá að áhrifin á gróður hafi frekar verið jákvæð en hitt. Hvað sauðfé varði sé hins vegar slæmt að setja þurfi það í hús eftir að ærnar eru bornar. „Spurningin er fyrst og fremst um að þetta verði ekki langur tími. Að þrengja þannig að fé býður heim hættunni á sjúkdómum og öðru slíku.“ - gar