Lék aðalhlutverkið í háleynilegri bílaauglýsingu

„Það borgar sig stundum að vera pattaralegur,“ segir Víkingur Kristjánsson, sem leikur stórt hlutverk í nýrri auglýsingu fyrir hina smávöxnu bílategund BMW-bílarisans, Mini Cooper. Auglýsingin var tekin upp hér á landi fyrir skemmstu.

Samkvæmt heimildum Fréttablaðsins sótti annar hver leikari á landinu um að komast í umrædda auglýsingu enda hafði sú saga gengið fjöllum hærra í leikarabransanum að starfið væri vel borgað og jafnvel talað um sjö stafa tölur í því samhengi. Víkingur viðurkennir að hann hafi fengið ágætis laun og bætir því við að félagar hans í leikhúsinu hafi á tímabili haldið að hann hefði orðið snögglega ríkur á bílaauglýsingunni.

„Svo var nú ekki. En þetta var ágætlega borgað.“

Tökurnar fóru fram vestur í Dölum en það voru True North og Eskimo sem aðstoðuðu útlendingana hér á landi. Mikil leynd hvíldi yfir tökunum enda var um að ræða 2012-týpu og því má ekkert kvisast út.

„Öll myndataka var bönnuð á tökustað og það var einhver Þjóðverji sem fylgdi bílnum við hvert fótmál og gætti þess að engar myndir væru teknar.“

Þetta er reyndar ekki í fyrsta skipti sem jafn háleynileg auglýsing er tekin upp hér á landi því í fyrra mætti Peugeot-fyrirtækið með sína nýjustu týpu hingað til lands. Þá náði ljósmyndari mynd af bílnum og fór sú mynd út um allan heim.

Víkingur segir það hafa gengið ágætlega að komast inn í Mini-bílinn sem, eins og nafnið gefur til kynna, er af smærri gerðinni.

„Og ég fékk ekkert mikið að keyra, það var einhver fyrrverandi Íslandsmeistari í rallíi sem var fenginn til þess. Ég settist aðallega upp í hann í nærmyndatökum og fékk að þykjast keyra hann.“

Þetta er í fyrsta skipti sem Víkingur reynir fyrir sér í erlendri auglýsingu og hann segir þetta hafa verið skemmtilega reynslu.

„Það var gaman að sjá hvernig þetta virkaði. Við vorum reyndar óheppnir með veður seinni tökudaginn, þá snjóaði alveg heilan helling en við græddum auka tökudag í staðinn.“

freyrgigja@frettabladid.is