Hitar upp fyrir ferðalag

Hljómsveitin Hjaltalín hitar upp fyrir væntanlega tónleikaferð sína um Evrópu með tvennum tónleikum á Rosenberg í kvöld og annað kvöld. Þetta verða fyrstu tónleikar Hjaltalín hér á landi í þrjá mánuði.

Í næstu viku heldur sveitin í tónleikaferð um Bretland og víðar um Evrópu sem stendur yfir í heilan mánuð. Á tónleikunum á Rósenberg verður tækifærið notað til að prufa ný lög fyrir tónleikaferðina. Dagana fyrir ferðina ætlar sveitin einnig að skella sér í hljóðver og leggja drög að nýrri plötu. Ekki er búist við að hún komi út fyrr en í fyrsta lagi snemma á næsta ári.