Ennþá verið að veiða gæs í Landeyjum

Nú þegar stuttri rjúpnavertíð er lokið hafa flestir veiðimenn lagt byssunum sínum og snúið sér að amstri jólanna en það eru þó einhverjir sem eru ennþá í veiðihug og þá kemur nokkuð á óvart að heyra af gæsaskyttum í Landeyjum.

Gæsaveiðin byrjaði vel fyrir austan en í október datt veiðin alveg niður þrátt fyrir að nóg væri af fugli.  Gæsin hundsaði marga akrana þrátt fyrir að vel hefði verið sett í þá af korni og á mörgum af betri gæsajörðum svæðisins sást varla fugl í nóvember.

Við fengum þó fregnir af einum veiðimanni sem var að skjóta í Landeyjum um liðna helgi og eins og sést á myndinni þá var veiðin góð.  Nokkuð er af gæs á dreif um svæðið og þrátt fyrir frosthörkur þá hefur fuglinn gefið færi á sér þegar vel viðrar.  Umræddur veiðimaður er Oddur Guðnason, landfræg skytta og einn af þeim sem hefur talað máli hófsemdar í veiði.  Við óskum honum til hamingju með flottan dag og þökkum Benedikt Guðmundsyni fyrir fréttina.