Keflvíkingar unnu í framlengingu í Hólminum

Keflvíkingar tóku þriðja sætið af KR-ingum með því að vinna dramatískan 115-113 sigur á Snæfelli í framlengdum leik í Iceland Express deild karla í Stykkishólmi í kvöld. Charles Michael Parker var hetja Keflavíkurliðsins því hann tryggði liðinu bæði framlengingu sem og sigurinn með því að skora sigurkörfuna í lok framlengingarinnar. Parker skoraði 10 af 32 stigum sínum á framlengingu og síðustu sókn venjulegs leiktíma.

Parker skoraði eins og áður sagði 32 stig en hann tók einnig 12 fráköst. Steven Gerard Dagustino var stigahæstur hjá Keflavík með 36 stig og Jarryd Cole var með 23 stig og 10 fráköst. Almar Stefán Guðbrandsson var stigahæstur íslensku leikmannann með 14 stig.

Hafþór Ingi Gunnarsson og Quincy Hankins-Cole skoruðu báðir 23 stig fyrir Snæfell og Marquis Sheldon Hall var með 20 stig og 9 stoðsendingar.

Keflvíkingar byrjuðu vel og komust í 13-3 og 16-7 í upphafi leiks. Það tók Snæfellinga þó aðeins tvær mínútur að komast yfir en Hólmarar skoruðu þá fjórtán stig í röð og voru síðan með fjögurra stiga forskot, 23-19, eftir fyrsta leikhlutann. Snæfellingar héldu frumkvæðinu í öðrum leikhlutanum og voru 49-41 yfir í hálfleik.

Snæfellsliðið skoraði sjö fyrstu stigin í seinni hálfleik og var um leið komið með fimmtán stiga forskot, 56-41. Keflvíkingar tóku aftur á móti við sér eftir leikhlé Sigurðar Ingimundarsonar og munurinn var bara tvö stig, 74-72, fyrir lokaleikhlutann eftir að Keflavíkurliðið vann síðustu fjórar mínútur leikhlutans 17-6.

Snæfell komst sjö stigum yfir í upphafi fjórða leikhluta þar sem Hafþór Ingi Gunnarsson hrökk í gang og setti niður átta stig á tæpum þremur mínútum. Snæfell var 97-91 yfir þegar rúmar tvær mínútur voru eftir en Keflavík vann lokakafla leiksins 9-3 og tryggði sér framlengingu. Charles Michael Parker jafnaði leikinn í, 100-100, skömmu fyrir leikslok.

Snæfellingar voru áfram með frumkvæðið í framlengingunni og komust fimm stigum yfir, 109-104. Keflavík náði að jafna leikinn í 109-109 og það var síðan jafnt á öllum tölum í lokin. Charles Michael Parker var allt í öllu á lokamínútum leiksins og tryggði Keflavík 115-113 sigur með tveggja stiga körfu rétt fyrir leikslok. Parker skoraði alls átta stig í framlenginunni sem Keflavík vann 15-13.



Snæfell-Keflavík 113-115 (50-41, 100-100)

Snæfell: Hafþór Ingi Gunnarsson 23, Quincy Hankins-Cole 23/12 fráköst, Jón Ólafur Jónsson 22/5 fráköst, Marquis Sheldon Hall 20/5 fráköst/9 stoðsendingar, Pálmi Freyr Sigurgeirsson 14, Ólafur Torfason 6/8 fráköst, Egill Egilsson 3, Sveinn Arnar Davidsson 2.

Keflavík: Steven Gerard Dagustino 36/4 fráköst/5 stoðsendingar, Charles Michael Parker 32/12 fráköst, Jarryd Cole 23/10 fráköst, Almar Stefán Guðbrandsson 14/4 fráköst, Magnús Þór Gunnarsson 8, Hafliði Már Brynjarsson 2.