Einar Andri: Mikilvægur punktur

Einar Andri Einarsson, þjálfari FH, fagnaði stiginu í lok leik HK og FH en bölvaði á sama tíma að taka ekki bæði stigin í frábærum leik í Digranesi í kvöld þar sem HK og FH skildu jöfn 30-30.

„Það er blendnar tilfinningar eftir þennan leik. Við vorum komnir í ákveðna holu þegar tíu mínútur voru eftir, tveimur undir. Það leit ekki vel út fyrir okkur en í lokin vorum við marki yfir og þeir jafna úr víti á lokasekúndunni sem er svekkjandi en heilt yfir fannst mér þetta virkilega skemmtilegur handboltaleikur. Örugglega einn sá besti það sem af er tímabili. Það var margt jákvætt í okkar leik,“ sagði Einar Andri en FH var fjórum mörkum yfir í upphafi seinni hálfleiks en misstu það fljótt frá sér.

„Við hlupum á einhvern vegg. Það var kannski einhver pínulítil þreyta í liðinu en menn rifu sig upp úr því og náðu í punkt í lokin. Það var mikilvægt.“

FH lék í Belgíu um helgina í EHF- keppninni þar sem liðið sigraði Initia Hasselt en íslensk lið hafa oft átt erfitt uppdráttar í kringum Evrópuleiki.

„Það er alltaf gott að sækja stig hingað. Það er erfitt að sækja tvö og mér fannst liðið spila sóknarlega mjög vel allan tímann. Óli Gústafs var auðvitað frábær. Vörnin var ekki alveg nógu góð og markvarslan hefur verið betri,“ sagði Einar en FH lék án Ragnars Jóhannssonar sem er meiddur og missir af næstu leikjum liðsins.

„Það er ekki alveg komið í ljós með hann. Líklega þarf hann að fara í liðþófa aðgerð og hann verður frá í einhverjar vikur,“ sagði Einar að lokum.